M-OSH CLUB 成立於 2016年6月，以Facebook 平台宣傳日本樂隊及推廣Livehouse文化，從而推動更多日本樂隊來港演出。
由於 Facebook 專頁難以將文章分類，所以 M-OSH CLUB 為方便讀者而設立網誌。
雖然說以分享音樂及推廣日本樂團為目的，但相比起其他專頁，M-OSH CLUB 算是非常進擊且帶有野心的，因為不滿現況所以想要以一己之力來改變。其實本專頁並非以本來對日本音樂有興趣的人為主要族群，可以的話，我希望是全香港的人。音樂本來不應受地理、語言的限制，希望每個人也可以分享 M-OSH CLUB 給身邊的人。
個人人力推樂團 PELICAN FANCLUB 《記憶について》（關於記憶）一曲中主唱 Endo 唱到「重要的事情 全都吶喊出來」。六月推出的最新專輯「OK BALLADE」以「現在」作為主題，因為對於未來感到可怕，所以才想要珍惜「現在」這一刻，現在眼前的自己只有「現在」這一刻的自己，下一秒後就成為「過去」，當然這些都是老生常談，一切都是理所當然的事，可是認真想起來的話，對於時間的流逝還是感到可怕。 世上沒有時光機，我們可以做到就只有勇敢直視「現在」的自己，在「現在」這一刻，把重要的事情都吶喊出來，分享重要的音樂給重要的人，隨便也分享一下本專頁給更多人。 經常有人說 J-POP 末落，一直停留十年前。但撫心而問，你有認真地留意嗎？聽音樂首先要拋開 POP 和 ROCK 的觀念，J-POP 和 J-ROCK 本來就沒有清楚的界線，留意開 J-POP 的人也請多留意一下樂團界，近年出色樂團實在多不勝數，錯過了的話也是你個人損失，又如「記憶について」一曲中唱到「想要相信肉眼看不到的事」，眼見以為真，卻不願意相信自己看不到的事，即使肉眼看不到也不能否認這些無形的存在，又例如「記憶」，不能被誰奪走，因為無形所以尤其珍貴，每一場 Live 的記憶也是無價的，所以當有日本樂團來港演出時請給予自己一個機會創造回憶。
M-OSH CLUB 並不單純指令我們身體上想要 Mosh 的音樂，而是衝擊到內心，希望每一個人也可以找到那樣的音樂，就如找到命運中的那一個。 無限感激 ☻
赤色のグリッター於2012年在千葉県柏市成立，幾經成員更替後2013年7月形成現在的陣容，全員皆為 1995
年出生，正式結成嘅四個月後樂團參加RO69JACK13/14，隨即取得優勝，當時只有十八歲嘅佢地首次登上 COUNTDOWN JAPAN
13/14 舞台，緊接下來嘅 CDJ 14/15 同今年嘅 ROCK IN JAPAN
都見到佢地蹤影，唔知係唔係因為一切黎得太快，樂團火速成名登上各大音樂節後，雖累積一定數量嘅樂迷，但近年人氣仍然唔上唔落，同佢地差唔多時間組成嘅伙伴
Mrs. GREEN APPLE 已於短短兩年間成功主流出道並爆紅，兩團曾經係舊年八月至九月舉行過對 Band
Tour「赤と緑のホショクツアー」，慶幸自己有參與過 Tour，兩團人氣差異越黎越多，相信好難再係只有 2/300人嘅 Livehouse
睇到佢地。
2015年，樂團全員成為二十歲，正式成為成人，係呢一個尷尬嘅年紀，佢地係十二月推出咗1st Full
Album「存在証明」，樂團人氣浮浮沉沉，主唱曾經有諗過放棄音樂，如專輯名所講，樂團希望可以搵到自己嘅「身分」希望以音樂黎證實自己存在過，而今次介紹「神様の涙」就正正係主唱自己嘅寫照，即使失去自信失去自我，世界上仲有可以安置心靈嘅地方，而對主唱佐藤黎講，個一個地方就係
LIVEHOUSE。
坦白而言，樂團除咗主唱佐藤把獨特嘅聲音外都無咩特別，甚至連成員姓氏都非常普通，除咗鼓手姓倉員外，結他手鈴木，Bass
渡辺以及主唱佐藤都係日本全國最常見姓氏頭幾位，但由於佢地係我第一隊真正接觸過 Indie Band 所以個人私心大力推介，感情始終直接啲好。
如有興趣請觀看完整 MV
見最近咁多人去睇 Tim Burton 套新戲，就黎介紹一下同 Tim Burton
甚有淵緣既兩位奇女子啦。事緣幾年前日本新宿有一間喫茶店"すみれの天窓”，Tim
Burton每一次去日本都會去呢間鋪頭，而係鋪頭入面仲留有一啲佢既真跡。咁到底呢間鋪有咩咁特別呢？原來すみれの天窓係由黒色すみれ既兩位女子開既，而Tim
Burton好鍾意佢地，佢仲話過係自己既ipod入面一定會有黒色すみれ既歌，成日都會聽。講咁多野，都係想大家認識一下黒色すみれ呢個咁神秘既組合
🙂
如果話日本有兩個女仔玩既音樂係將日本同西方文化融合，好多人應該都會諗起チャラン ・ポ・ランタン，而如果將チャラン ・ポ・ランタン再加上多啲classical，同埋多少少黑暗氛圍，咁就會係黒色すみれ喇。黒色すみれ以vocal/piano/accordion加上violin/chorus既編制而結成，玩既音樂都一樣好有馬戲團色彩。當中濃濃既古典元素、帶有歌德味道既造型，令到黒色すみれ係外國Gothic
Lolita界都有好多人認識，仲曾經係2009年開過法國tour。由於今次主角係黒色すみれ，所以就揀左佢地自己既作品"月光恋歌”分享俾大家，但其實小編覺得最可以感受到黒色すみれ魅力既，往往係佢地同人合作既時候。就好似係2014年同樂隊
BUCK-TICK 合作既Victims of Love，個人覺得都算得上係神作 🙂
香港人壓力太大，一有幾日假期就想去旅行逃避現實，廉航多咗，近幾年好多人話飛就飛，實不相暪本人今年去咗五趟日本旅行，北海道仙台東京大阪名古屋福岡⋯加加埋埋都有成十三個禮拜，普遍香港人就唔聽日本音樂，但個個都鍾意日本，二十一世紀，人人都話尋找自由，高舉「獨遊萬歲」，好似一個人旅行係一件非常值得歌頌嘅大事，唔知幾時開始，「一個人」變成一樣「不平常」嘅事，「一個人旅行」「一個人睇戲」甚至「一個人食飯」都被標籤，唔知係唔係偽毒要顯示自己嘅「毒」，定還是「文青」鍾意 Show Off 自己一個人好自由好浪漫，本來理所當然嘅事突然變得「不平常」。
講到呢到，其實我都係獨遊主義，原因好簡單，怕麻煩，我相信呢個世界唔會有人同我一樣，為咗睇 Live 願意一日來回十四小時來回大阪，再返東京睇幾十場 Live，與其搵個伴，不如學習獨處，於是一個人去兩年間去咗十幾次旅行，為嘅只係睇 Live，所以我唔承認自己熱愛旅遊，老實講旅行好攰，可以嘅話我好想好似日本人咁平常，放學放工去 Livehouse，可惜嘅係我係香港人，每一次睇 Live 我都要拋下香港嘅一切，踏上旅途，無計㗎，佢地唔黎香港咁咪自己去日本。
回到正題，今次介紹嘅係以「日常變得獨特」為主題嘅三人電子音樂組合 UQiYO | ウキヨ ，坦白地說樂團非常高質但樂團知名度非常低，我都係前排去嘅 Live 有佢地出演所以開始接觸，初次係 YouTube 接觸佢地時我感到非常驚訝，有咩理由咁靚嘅 MV 同音樂得咁少人睇，所以我必須向大家介紹一下佢地，「Twilight」一曲以旅遊為主題，MV 中嘅主人公一開始獨自係大自然冒險，後來遇到其他人成為同伴，旅遊總係充滿歷險同驚喜，一個人係旅遊上遇上各式各樣唔同嘅人，最終未必成為朋友，但彼此會記得，曾經係個一段旅程中遇上過一個人，互相訴說過自己嘅故事，第二朝起身，佢已經 Check Out 走咗，雖然無交換聯絡方式，但有緣的話，或者未來會再係一個地方相遇，呢一個就係旅遊嘅樂趣所在。
