【拯救孤獨靈魂的搖滾】の子 與 大森靖子

相信好多人都知道日本係一個好孤獨既國家，無緣社會、孤獨死⋯⋯所有呢啲字眼都源自孤獨。會長經常都講音樂可以拯救世界，黑魔法使都同樣相信呢句說話，所以都想趁機同大家分享曾經拯救小編既音樂－大森靖子。

當初接觸大森係係 YouTube 睇到一條 Tokyo Idol Fest 既片，第一反應覺得佢係一個痴線婆，但長年訓練有素既小編當然唔會俾佢嚇到。結果睇到最後就同啲彈幕一樣覺得唔應該會係 Idol Fest 見到大森，因為佢唱出左真正既搖滾。後來理所當然地，大森出現係好多 Rock Fest，而令到更加多人認識佢、被佢拯救。

大森既歌往往都將自己心入面最真實既想法寫出黎。每個人都係生而為孤獨，生活中免不了會有覺得孤獨失落既時候。大森既歌卻可以俾到一個支撐你，佢唔會叫你好正面用正能量面對一切；但佢會俾你知道你就算孤獨但你永遠唔會孤單一人，令你明白世界一定唔會事事如意；人並非機器，每個人都會唔開心，只要將孤獨、一切不快都叫出黎，過後一樣可以復原繼續生活。當感到孤獨既時候，聽下大森既歌感覺永遠都會好番啲。

以下第一條片就係小編第一次睇大森既片，一開始睇你一定會覺得好怪；但如果你堅持到睇到後面，我相信大森既熱情一定可以傳達到俾你。呢場既set list有一啲歌講到大森既人生觀愛情觀，甚有啓發性。至於之後嗰首係小編覺得係低落既時候最俾到力量既，歌詞都講到大森對於音樂既音樂既熱情。

大森靖子Live@TIF 2013

大森靖子／音楽を捨てよ、そして音楽へ：

標題寫到既另一位，就係同樣用搖滾拯救好多人，來自樂隊神聖かまってちゃん既の子。今次打呢篇，其實主要都係想介紹最近の子同大森合作既一首歌"非国民的ヒーロー”。集合日本樂壇兩大痴線佬既作品，果然佢地都好叻寫令人感動既旋律。特別想寫一下 MV 中間有一少段大森係水邊既彈唱，雖然好短，但令人印象深刻。小編覺得，對於被大森和の子拯救過的樂迷黎講，佢地可能係真正既英雄，咁就當呢首歌係咁解啦。

大森靖子/ 非国民的ヒーロー :

歡迎各位 Follow 返 Instagram。
https://www.instagram.com/moshclubhk/