講起星野源，可能好多人第一次聽佢個名係因為今晚首播嘅日劇「逃げるは恥だが役に立つ」入面星野源飾演新垣結衣老公，引來廣大男士妒忌，消息一出香港傳媒講到星野源「高攀」結衣bb 咁，但其實星野源只係海外知名度尚低，身兼歌手、演員及作家等多重身分嘅星野 源係日本已近乎國民級地位，外表唔算出眾，但有齊「鹽臉男子」特質，佢本身都有一大班女性 Fans，更係次文化女子必喜歡嘅代表。
星野源 2000 年組成樂團 SAKEROCK（サケロック） ，2003年開始出演日劇電影多棲發展，2010年係細野晴臣推薦下 SOLO 出道，其後曾因病而活動休止，手術成功後再度活躍於藝能界，2013年首次出演電影「深宅家中兒子的戀愛」及園子溫電影「地獄為何如此惡劣」並於同年獲得新人男演員獎，2016年推出嘅專輯「YELLOW DANCER」更奪得 CD 大賞最高殊榮，上星期推出「逃げるは恥だが役に立つ」主題曲「恋」銷量更係一星期突破十萬張。
星野源自小受熱愛 Jazz 嘅父母影響，耳濡目染下星野源更成功地將 Jazz / Funk Music 帶到主流樂壇，近年更掀起一片星野源旋風，雖然樂團 SAKEROCK 已經係舊年解散，星野源仍然以個人身分係音樂界活躍，更係現今少有出演大型音樂節嘅獨立男歌手，而且次次都係最大舞台，星野源實在唔簡單，大家睇劇之餘不妨留意下佢嘅音樂。
// 延伸閱讀 //
【週末好去處】嚴選樂團界鹽臉男子
【週末好去處】嚴選樂團界鹽臉男子
沒有留言:
張貼留言