【不斷躍動的優美旋律】DAVID / Rega

今晚（一陣）就係 tfvsjs 既《zoi》巡迴最終香港場，同大家介紹一隊同樣咁正既 instrumental band：Rega 。

如果話 tfvsjs 係複雜節拍之中有種深沉，咁 Rega 就係不斷躍動既優美旋律。雖然無其他 Math Rock Band 咁突出節拍技巧，但每一個樂句都令人不由自主咁搖擺同跳之餘，旋律都好 Catchy 留下深印象。好似呢首〈DAVID〉，明明只係 shima fes上聽過一次，呢幾日就不斷咁洗緊我腦…

佢地亦都係 tfvsjs 日本巡迴大阪同京都場既共演樂團。其實三年前 CityU Band Soc Annual Performance 都有請過佢地黎香港表演，可以上 youtube 睇返片段：https://www.youtube.com/watch?v=71YnQYDiZLc

【那年夏天最後的花火】若者のすべて / フジファブリック（FujiFabric）

八月結束，放暑假嘅要開學，雖然踏入社會後唔會再有「暑假」，不過夏天總係令人有好多嘢想做，例如去夏天音樂節，又或者去花火大會。

或者香港唔同日本，夏天除咗大地同雨水外就無其他特別，祭典又無，浴衣又無，就連「喜歡的人」都可能唔存在。

FUJIFABRIC 呢首若者のすべて可以話係夏天代名詞，最近係 SWEET LOVE SHOWER 大雨中睇完演出，最後唱咗「若者のすべて」。回顧返今個夏天自己又有無好好咁享受青春，青春所謂何物？到底係年齡上定心靈上？一個人嘅青春可以維持幾耐？定係好似編劇宮藤官九郎咁講，四十幾歲嘅自己仍然好青春？

對我黎講，只要我仲有為追求某事物而奮不顧身嘅精神，我仲係青春。

【大人的 City Pop 「神泉系樂團」】夜にダンス / フレンズ(Friends)

星期一晚不如一齊跳下舞，又或者好似呢個 MV 入面咁，突然係 Office 跳下舞啦。

日本人鍾意跳舞，City Pop 呢幾年又大熱，フレンズ（Friends）可以話係食正個勢。樂隊於2015年6月結成，成員包括おかもとえみ(Vo/科楽特奏隊、ex.THEラブ人間)、ひろせひろせ(Vo,Key/nicoten)、三浦太郎(G,Cho/ex.HOLIDAYS OF SEVENTEEN)、長島涼平(B/the telephones)、SEKIGUCHI LOUIE(Dr/ex.The Mirraz)。

フレンズ（Friends）標榜自己係神泉系樂團，神泉與繁華喧鬧嘅涉谷相距一個站，有種令人安心嘅感覺。不過我覺得改呢個名差實在太差…… 雖然明白佢個種五個唔同背景嘅成員一齊似朋友咁，但佢將 Friends 以片假名寫，唔識日文嘅外國人根本睇唔明，又或者日本人 Google 都未必搵到隊 Band。

最近去宇都宮睇 Live，準備食餃子個陣巧遇佢地🌝 同佢地打招呼，之後都話好想黎香港。

夜にダンス / フレンズ（Friends）
https://www.youtube.com/watch?v=P20NA5_nMfw

【如果音樂有限期 D.A.N. 就係永遠】Ghana / D.A.N.

2016 年及今後幾年最不能錯過日本樂團非 D.A.N. 莫屬。四月推出同名 EP 旋即係業界中取得高評價，更被稱為主宰今後日本 Indie Scene 嘅關鍵。

樂團於 2014 年成立，三名成員都係 1993 年出身，非常年輕。樂隊以 Japanese Minimal Mellow 為中心概念，希望創作出經得起時代嘅音樂，無論幾時聽都咁 Chill。

正確黎論其實真係無法定義佢地嘅音樂類型。Ghana 呢首歌一開頭莫名其妙嘅錄音反而吸引人注意。不過唔知點解佢地 MV BLOCK 咗海外，咁 M-OSH CLUB 分享少少比大家睇下。

.

完整MV：https://www.youtube.com/watch?v=ip_KGBBPUU0

【又，又係 City Pop 又係 Club】eye / MARQUEE BEACH CLUB

呢幾年日本究竟出幾多隊 Club 同 City Pop？唔知幾時會飽和，不過新嘢聽下都幾好，如果鍾意 Awesome City Club 嘅應該都會鍾意呢隊 MARQUEE BEACH CLUB，最近 Tower Records 同 Village Vanguard 都大力推薦，最近更被 Apple Music 選為「今週のNEW ARTIST」。

樂團於 2014年茨城組成，目前以東京為據點發展，Live 演出日程可參考http://marqueebeachlive.tumblr.com/

完整MV：https://www.youtube.com/watch?v=ljSTTgDSv3Q

【微縮下的東京】ハッピーアイスクリーム (Happy Ice Cream)/ The Mirraz

日本而家處於台風狀態。大風雨嘅日本其實真係好恐怖，唔少電車同新幹線都運休，原宿站甚至有大樹倒塌。落雨當然留係 Livehouse 睇 Band，又或者留係室內聽歌，咁不如聽下嘈少少嘅 The Mirraz。

細個一直無機會去日本，只能靠日劇電影中想像日本。大個咗，去完日本，再望返日劇電影中嘅日本，已經唔係觸不可及，而係「我去過呢到！」

完整MV：https://www.youtube.com/watch?v=s3DPEwUeWXE

【活著的證明】Lemon Song / Gateballers

成日話〝No Music, No Life.〞，咁究竟音樂對人生有幾重要呢？

中二病啲講句，每次睇到我最鍾意嘅樂團 Live，切實地感到「活著真好」。又或者日本電影式咁講一句「出生係呢個世上係為咗與你（樂團）相遇」，唔知有幾多人可以搵到一隊令自己呢個想法嘅樂團，好慶幸自己已經搵到（ PELICAN FANCLUB ）。

聽住 Gateballers 呢首「Lemon Song」中唱到 

「我在活著
真正地活著
誰也不會說 也不會答訴我
今天也睡不著」

不禁質問自己⋯自己到底有無好好地活著。
好彩有音樂。

介紹返隊 Band，Gateballers 成立於 2013年東京，目前隸屬小山田壯平（AL, ex. andymori）所創立嘅 Sparkling Records，如果鍾意 andymori 或 AL 嘅人絕對唔可以錯過。

完整MV：https://www.youtube.com/watch?v=sriPS462RRY

【聽日一定會更好天嘅】明るい未来 / never young beach

星期五夜晚，終於可以放鬆一下，不如等 never young beach 帶你到南海岸 Chill 一下。聽住主唱安部勇磨充滿昭和感同望住佢親切嘅笑容，成個人都會被治癒。

City Pop 同傳統日式搖滾最大分別就係唔需要好熱血，唔知關唔關寬鬆世代事，never young beach 嘅歌講嘅都係一啲生活平常事。好似呢首明るい未来（光明的未來），就係講情侶間，MV 以「男友風」角度拍攝同女 Model 「kanaco」嘅生活點滴，只要有你，就有未來，生活簡簡單單，唔需要做太多偉大嘅事⋯

不過好可惜呢個 MV Block 咗海外，所以想聽歌嘅可以睇埋 Live 片段：https://www.youtube.com/watch?v=RK5ux4-W0a0

【關於「說明」自己身份】說明 / PELICAN FANCLUB

前排 Share 完呢個 MV， 無乜人有反應，但呢首歌同呢個 MV 一定係 2016年最型嘅歌，雨のパレード主唱福永都話好鍾意呢首歌。

每個人對同一首歌可以有好多嘅解讀⋯唔知有無人留意到「文青」好鍾意係 Instagram Profile 到寫「Music / Movie / Fashion」等⋯最好笑係見過有人寫自己「KOL，Swimmer⋯」⋯其實我地用緊 Facebook 都係 Facebooker，不如寫埋自己係「Instagramer」「Whatsapper」？

唔知點解而家嘅年青人好鍾意標籤自己，例如有部分人會強調自己只聽 Indie ，覺得主流嘅都係垃圾⋯

最近去完佢地 Live 嘅香港朋友都被佢地深深吸引，所以幫手翻譯咗以下歌詞，歡迎討論自己嘅睇法。

//

音樂　不需要
電影　不需要
戲劇　不需要
繪畫　不需要
漫畫　不需要
玩具　不需要
遠離娛樂的文化流向
足不出戶
對人毫無興趣
卻也不想被人討厭
哈？完全聽不明白
從不發怒
也幾乎不笑
「最近的年輕人啊」被如此地說三道四之中
音樂　不需要
電影　不需要
戲劇　不需要
繪畫　不需要
漫畫　不需要
玩具　不需要
因為甚麼也是若有似無

說明你的美學啊
若是骯髒之物　或者是污穢言詞的儀式
那就給我切腹
喊著「我會比誰都變得更美」

沒有面目　去面對後悔
那昏暗的未來又如何呢
這才是讓你顏面盡失吧
「每人都各不相同」這言詞是如此危險
聽著，給我聽好　然後立即回答
除了光速以外都給我消失
緊緊抓住時間的速度不放
發財樹上　集滿了毒蟲

是誰　在排放著怠惰與無聊
大概是有害的人正在發狂的腦吧
那麼出外走走如何？
累透了吧　嘿死人
必要的事物都並非必要
背椎上不會烙上兩道傷口
不想燃燒的感性只是滑稽
藍色血管　別再開玩笑

說明你的美學啊
若是骯髒之物　或者是污穢言詞的儀式
那就給我切腹
喊著「我會比誰都變得更美」