【假如一開始就沒有相遇這件事】我逢人 / Mrs. GREEN APPLE

新世代最強武器非 Mrs. GREEN APPLE 莫屬，甚至被譽為次世代嘅 SEKAI NO OWARI。雖然今年從年頭開始就陸續有唔同年輕樂團主流出道，但講起年齡，Mrs. GREEN APPLE 仍然處於極大優勢，1996 年出生嘅主唱大森元貴係今年九月先滿 20 歲，正式成為大人（今年主流出道嘅樂團大多都係 1991/ 1992 世代，好似 SHE'S / My Hair is Bad 等）。

雖然音樂唔係以年齡黎決勝負，但未滿二十歲已經成功帶領到樂團從 Indie 到主流出道，可以話潛力無限。大森元貴自十二歲開始自己係屋企創作，一開始由 Bass line，Guitar Riff 到 Drum Pattern 都係由佢一個人包辦，而呢一段 Live 片入面〈我逢人〉就係大森元貴係十七歲時創作。歌名「我逢人」出自中國禪語，從字面解釋就係「人與人之間的相遇」，呢首歌係其中一首我最鍾意，而由於片入面呢場 Live 正正就係我第一次係現場睇 Mrs. GREEN APPLE，第一次同佢地相遇，所以好想分享比大家睇。

片段中嘅大森元貴當時只有十八歲，但佢嘅台風同演奏力完全超出一個十八歲應有嘅水平，雖然外表仍帶有點稚氣，但佢一開口舉手動足就可以吸引到全場將目光放係佢身上，個人魅力尤其出眾。
當然樂團並唔係靠一個人，仲有 1993 年出生嘅 Keyboard 手藤澤涼架帶動氣氛，尤其日本好多 Live 演出都係一場有幾隊 Band，觀眾未必識每一隊，所以如何令到呢啲觀眾就算唔識都可以睇得開心，氣氛帶動者好重要，好似藤澤涼架就好鍾意係台上跳跳紮，帶領觀眾一齊跳。

隨住 Mrs. GREEN APPLE 人氣越黎越旺盛，年紀輕輕嘅佢地尤其吸納咗好多中學生樂迷，越黎越少機會係細 Livehouse 到睇到佢地，亦無機會再同大森元貴吹水，距離感越黎越大，自己亦無以前咁常聽佢地，但如果當初無同佢地相遇過，無見識過佢驚為天人嘅演出，或者我而家聽緊嘅音樂又唔同咗。

「比方說從來沒有「相遇」這件事
比方說連「你」也沒有存在過
那樣的話 那樣一定
一個人寂寞和悲傷到連呼吸也停止了吧

你的溫柔讓我即使受傷也能笑
但也只有你的微笑
讓我從心底討厭這個拯救不了的世界」