【智能手機將成為我的內臟 獻給幻想振動症候群的你】ファントムヴァイブレーション（Phantom Vibration) / キュウソネコカミ（Kyuso Nekokami）

今次想介紹返キュウソネコカミ（Kyuso Nekokami / 窮鼠）。或者香港人對佢地個名好陌生，但佢地係日本名氣絕不遜於 [Alexandros] 或 KANA-BOON 等樂團。好可惜佢地改名改得差，唔識日文嘅未必會記到佢地嘅名。

不過就算唔識日文，睇佢地嘅 MV 都一定識笑。佢地真係好識利用 MV 黎炒話題，好似2013年推出嘅〈ファントムヴァイブレーション〉（Phantom Vibration)，中文即係「幻想振動症」——明明手機無震，但自己覺得有震……我諗大家都明。

MV 入面又扮 Apple 又扮 au 廣告，非常有趣。明明無事但一得閒又好想碌手機有咩睇、明明啱啱先碌完隔咗幾分鐘又好想碌多次、一發生咩事即刻想 Upload 係網上……歌詞寫得太貼切，當中最入骨就係樂曲中不斷重覆嘅「智能手機將成為我的內臟 」。

作為智能手機嘅奴隸，我當然唔會同大家講「得閒放底手機，望下周邊風景」呢啲廢話。可能智能手機真係減少咗好多人與人之間嘅面對面溝通，但毒毒地嘅我覺得智能手機實在係偉大發明，尤其朋友飯局覺得無癮時可以禁下手機，一個人睇 Live 等開演無嘢做又係禁手機，我又成日諗如果無智能手機，我應該去唔到日本旅行，無 Google Map 又無得查點搭車更加唔可以即時網上 Google。

其實又真係好甘心比智能手機成為我嘅內臟。