【大多數人認同的 ＝ 正確？】天使と悪魔 / SEKAI NO OWARI

呢個世界好得意，當大部分人認同嘅就會變咗「正確」，「少數」就會被排斥，而跟隨主流認同所謂「正確」嘅人可能根本唔知道自己所選擇嘅為何「正確」，只會一味指摘與自己持相反意見嘅「少數」。

第一次認識 SEKAI NO OWARI 就係因為呢首歌「天使と悪魔」，2010年被選為「霊能力者 小田霧響子の嘘」主題曲，當時嘅石原bb 仲未有咁多人識，當時嘅「 SEKAI NO OWARI」仍然係「世界の終わり」，後來為咗向世界發展而改咗做「SEKAI NO OWARI」，事實證明當初改名係正確。

主唱 Fukase 經常被人話係中二病，樂團出道以黎不斷受抨擊。但其實佢中二得黎歌曲歌詞好值得探究，好似呢首「天使と悪魔」講二元論，到底咩係正確，天使係唔係一定係善良，惡魔係唔係一定代表邪惡？

我又諗起經典日劇「LIAR GAME」入面嘅一個遊戲「少數決」。與傳統民主社會「少數服從多數」相反，遊戲中少數為勝。究竟咩係「民主」我真係好懷疑。一人一票係唔係就係民主？但事實反映好多人缺乏理性思考嘅能力，而社會中呢堆人更加係佔大多數，即使「少數」嘅理念同能力有幾卓越有幾優秀，因為佢地係社會入面嘅「少數」，所以佢地無得出聲。

如果有興趣可以睇返官方完整 MV，天使と悪魔 / SEKAI NO OWARI（內含中文字幕）
https://www.youtube.com/watch?v=hVFY4Yvv3ho